पाचथरमा चल्ने गाडीहरुमा लिइने गाडी भाडामा मनोमानी

दशै सकिएर घर तथा कार्यक्षेत्र फर्कने यात्रुबाट पाँचथरमा यातायात व्यवसायीले मनोमानी भाडा असुली गर्न थालेको खबर आएको छ ।

जिल्लामा भाडादर निर्धारण भए पनि अहिले सम्म तोकिएको भाडादर कार्यान्वयन नगरी मनोमानी भाडा असुली गर्ने गरेको यात्रु बताउँछन । मेची राजमार्गको पाँचथर सदरमुकाम फिदिम देखि झापाको विर्तामोडसम्मको भाडा जिपमा पाँचसय र बसमा चारसय ५० रुपैयाँ तोकिए पनि यातायात व्यवसायी र सवारी चालकले भने सात सय देखि एक हजार रुपैया सम्म भाडा लिँदै आएका छन ।

यात्रुको चाप अनुसारको सवारी साधन नहुँदा यात्रु झुन्डिएर र कोचाकोच गरेर यात्रा गर्न बाध्य छन । पाँचथर र इलामको सिमाना सप्तमीबाट राँके गएका सराङडाँडा–५ का सन्तबहादुर पाण्डेले दुई जनाको भाडा नौ सय रुपैयाँ तिर्नुपर्यो, जबकि दसै अघि सम्म त्यस स्थानबाट राँके पुगेको एकजनाको तीन सय रुपैयाँ मात्रै लिने गरिएको थियो ।

उनले भने, “दसै मान्नका लागि स्वदेश आइएको थियो तर दसै सकिएर विदेश फर्किंदा म र मेरी श्रीमतीको नौ सय भाडा तिरियो ।”

सवारीसाधनले उनीहरुले भनेको भाडा नदिए नलैजाने गरेका कारण जति भन्यो उति भाडा तिर्न बाध्य हुनु परेको तेह्रथुम छातेढुङ्गाका विकास चापागाईंले बताए । उनले भने, “अब गाडी पाइँदैन, उनीहरुले भनेको दाममा गएन भने त्यही होटलमा बस्नुपर्ने हुन्छ, त्यहाँ बस्दा झन् उति खर्च हुन्छ, त्यो भन्दा बरु एकदुई सय बढी नै भाडा तिरेर यात्रा गर्नु उचित होला, यसबारे सम्बन्धित निकायले कडाइका साथ अनुगमन हुनु भने आवश्यक छ ।”मनोमानी ढङ्गबाट भाडा असुली रहँदा पनि सम्बन्धित निकाय भने मौन छन । यस्तै, जिल्लाको ग्रामीण भेग झन मन लाग्दो भाडा नदिए सवारी साधनमा चढ्नै नदिने गरेको यात्रु बताउँछन । यसै बीच, पाँचथरका प्रमुख जिल्ला अधिकारी किरण थापाले भने यसबारे चाँडै अनुगमन गर्ने बताए ।

भाडादर निर्धारण समितिको सुझावका आधारमा यातायात व्यवस्था समितिले चार प्रकारको भाडादर निर्धारण गरेको प्रजिअ थापाले जानकारी दिए ।

अब सवारीसाधनले प्रतिकिलोमिटर ६ रुपैयाँ, वर्षायाम बाहेकका नौ महिना मात्र सवारी सञ्चालन हुने माटे सडकमा प्रतिकिलोमिटर १२ रुपैयाँ, सदरमुकामबाट कालोपत्र सडकमा सवारी जिप सञ्चालन गर्दा प्रतिकिलोमिटर तीन रुपैया तथा कालोपत्र सडकमा भ्यान सञ्चालन गर्दा प्रतिकिलोमिटर पाँच रुपैँया भाडा लिन पाउने व्यवस्था गरिएको छ ।

साभार अनलाइन खबर