नेपाललाइ हिन्दु राष्ट्र बनाउन भारतिय हिन्दुबादी संस्थाबाट करोडौ रकम सहयोग

पूर्वराजा ज्ञानेन्द्र शाहले बिहिबार राजधानीको बनकालीमा उद्घाटन गरेको अन्तराष्ट्रिय विराट हिन्दु महासम्मेलन ५ बुँदे प्रस्ताव पारित गर्दै शनिबार सम्पन्न भएको छ । 

बनकालीको उद्घाटन सत्र पछि कमलादी स्थित नेपाल प्रज्ञाप्रतिष्ठानमा भएको बन्दसत्रले विश्व हिन्दु महासंघ अन्तराष्ट्रियको अध्यक्षमा भरतकेशर सिंहलाई सर्वसम्मत अध्यक्ष चयन गरेको छ ।

सम्मेलनले विश्वको एक मात्र हिन्दु राष्ट्र नेपाललाई बलपूर्वक धर्म निरपेक्ष राष्ट्र घोषणा गरिएको तथा राजसंस्थालाई विस्थापित गर्ने काम भएको भन्दै तत्काल नेपालाई ‘हिन्दु अधिराज्य’ घोषणा गर्न माग गरेको छ । त्यसका लागि संघर्षका कार्यक्रमहरु सञ्चालन गर्ने समेत सम्मेलनले घोषणा गरेको भए पनि स्पष्ट मिति भने तय गरिएको छैन । महासंघका नवनिर्वाचित अध्यक्ष सिंहले निकट भविष्यमै आन्दोलनका कार्यक्रम सार्वजनिक गरिने पत्रकार सम्मेलनमा जानकारी दिए ।

पूर्वराजालाई फ्लप गर्न खोजियो

सिंहले बन्दसत्रमा केहि राजनीतिक अभिष्ट बोकेका व्यक्तिहरुले हुलदंगा गर्न पुगेको भन्दै आक्रोश व्यक्त गरे । शुक्रबार भएको यो तनावमा केहि व्यक्ति घाइते भएका थिए ।

उनले बन्द सत्र हलले आफूलाई सर्वसम्मत अध्यक्षको प्रस्ताव गरे पनि प्रतिनिधि नै नरहेका व्यक्तिहरुले ‘आफ्नो अभिष्ट पूरा नहुने देखे पछि’ उपद्रो मच्चाएको दाबी गरे । उनले भने, ‘केहि व्यक्तिहरु राजनीतिक अभिष्ट बोकेर आएका थिए, त्यो पूरा नहुने देखे पछि उपद्रो मच्चाए’, उनले भने, ‘ राजालाई फ्लप गर्न उपद्रो मच्चाइएको हो, यो निन्दनीय छ ।’

उनले आफ्नो चाहना पुन अध्यक्ष हुने नभए पनि सबैले प्रस्ताव गरे पछि बाध्य भएर स्वीकार गर्नुपरेको बताए ।

कहाँबाट आयो सम्मेलनलाइ पैसा ?

बनकालीमा पूर्वराजा ज्ञानेन्द्रले एक भव्य कार्यक्रमका बीच उद्घाटन गरेको महासम्मेलनमा कति खर्च भयो भन्ने कुनै हिसाव किताव आयोजकले देखाउन सकेन । पत्रकार सम्मेलनमा अध्यक्ष सिंहले खर्चको कुनै हिसाव किताव नभएको बताए ।

उनले सदस्य र सुभेच्छुकबाट मात्र आवश्यक रकम उठाइएको दाबी गरे । तर स्रोतले भने महासम्मेलनका लागि भारतीय हिन्दुवादी संगठनका साथै अरु हिन्दुवादी संगठनबाट करोडौं रकम प्राप्त भएको बताएको छ ।

निकै अव्यवस्थित ढंगले सञ्चालन गरिएको पत्रकार सम्मेलनमा आयोजकले नयाँ कार्यसमिति कति सदस्यीय हुने भन्ने पत्रकारको जिज्ञासामा समेत अनभिज्ञता देखायो । जवकी महासम्मेलनबाट अध्यक्षको मात्रै चयन गरिएको र पछि पदाधिकारीको चयन हुने बताइएको थियो ।

को–को सहभागि भए महासम्मेलनमा ?

महासम्मेलनमा नेपाल भारत अमेरिका , थाइल्याण्ड, पाकिस्तान, नेदरल्याण्ड, बंगलादेश, अष्ट्रेलिया, लगायतका मुलुकहरुबाट ३०० जना प्रतिनिधिहरुको सहभागिता रहेको निवर्तमान सचिव अस्मिता भण्डारीले जानकारी दिएको थियो ।

सम्मेलनमा शंकराचार्य बासुदेवानन्द, लोकसभाका सांसद आदित्यनाथ, जगतगुरु सूर्यचार्य, नेपालीबाबा, श्रीनिवासलगायतको सहभागिता रहेको थियो ।

साभार:: रातोपाटी