अन्ततः तामेल भयो लोकमानसिंह कार्कीको म्याद

तीनपटकको प्रयासमा सर्वोच्च अदालतका तामेलदार अख्तियार प्रमुख लोकमानसिंह कार्कीको घरमा म्याद टाँस्न सफल भएका छन । सम्बन्धित वडा कार्यालयका सचिवको रोहवरमा घरमा म्याद टाँसे पछि कार्कीले अदालतमा उपस्थित हुनको लागि सूचना पाएको मानिने कानुनी व्यवस्था छ । अब अख्तियार प्रमुखमा कार्कीको नियुक्तिबारे परेको मुद्दामा सुनुवाईको बाटो खुलेको छ ।
नियम अनुसार म्याद टाँसेको या बुझेको मितिले १५ दिन भित्र कार्की सर्वोच्च अदालतमा उपस्थित हुनुपर्छ । कार्की आफू नगएर वारेस मार्फत पनि सर्वोच्चमा उपस्थित हुन सक्नुहुन्छ । १५ दिन भित्र उपस्थित हुन नसकेमा अर्को ३० दिन सम्म म्याद थाम्न सकिने कानुनी व्यवस्था छ । यस हिसाबले कार्कीले ४५ दिन सम्म यो मुद्दालाई तन्काउन सक्नुहुन्छ । अदालतमा उपस्थित हुनुपर्ने दिनगन्ती भने कात्तिक १ गते देखि नै सुरु भएको छ ।
कार्की अहिले क्यानडामा हुनुहुन्छ । उहाँले अझै १० दिन बिदा थप्नुभएको बुझिएको छ । उहाँ अझै मुद्दा छल्न चाहनुहुन्छ भन्ने देखिन्छ । तर अब म्यादको सूचना टाँस भइसकेकाले ४५ दिनभित्र आफु या वारेस मार्फत सर्वोच्चमा उपस्थित हुनुपर्ने भएको छ ।
म्याद टाँसेको या बुझेको ४५ दिनभित्र मुद्दाका सम्बन्धित पक्ष उपस्थित नभए पनि अदालतले मुद्दाको पेशी तोक्छ । त्यस पछि दुवै पक्षले आफ्ना वकिल नियुक्ति गर्नेछन् र इजलासमा बहस गर्नेछन ।
अख्तियार प्रमुख कार्कीको नियुक्ति बदर गर्न माग गर्दै अधिवक्ता ओमप्रकाश अर्यालले रिट दायर गर्नुभएको छ । कार्कीसँग संविधानले तोकेका योग्यता नभएको, रायमाझी आयोगले जनआन्दोलनको दोषी ठहर गरेको अर्यालको जिकिर छ । २०७० वैशाखमा उच्चस्तरीय राजनीतिक संयन्त्रको सिफारिसमा कार्कीलाई अख्तियार प्रमुखमा नियुक्ति गरिएको थियो ।