एउटा मुसाको २०,००० 

विश्वकै सबैभन्दा बढी जनसंख्या भएको र फोहोर सहर मानिने इन्डोनेसियाको राजधानी जाकार्तालाई मुसाबाट मुक्त गर्न सरकारले नया अभियान चलाएको छ । यस अन्तर्गत सरकारले एउटा मुसा समाते बापत २० हजार स्थानीय रुपैयाँ अर्थात् १.५० डलर प्रदान गर्ने घोषणा गर्न लागेको समाचार संस्था एएफपीले जनाएको छ । 

सरकारले यो घोषणा जाकार्तामा मुसा उल्मूलन अभियानको एक अंग भएको र यसबाट सहरको सफाइमा सघाउ पुग्ने बताएको छ । 

जाकार्ताका सडक, गल्ली र सुकुम्बासी बस्तीहरूमा मुसा देखिनु सामान्य मानिन्छ ।

जार्काताका सहायक गभर्नरको हालै एक ठूलो मुसासँग मुठभेड भए पछि उनले यस्तो योजना सार्वजनिक गरेको बताइएको छ । उनले भनेका छन्, “एक मुसाका लागि हामी २० हजार रुपैयाँ अर्थात १.५० डलर दिन्छौं ।”

तर, उनले मुसा कसरी समात्ने, जिउँदो हुनुपर्ने कि मरेको, कहिले सरकारलाई हस्तान्तरण गर्ने भन्ने बारे कुनै जानकारी नदिएको बताइएको छ । मुसा मार्न बन्दुक भने प्रयोग गर्न भने पाइनेछैन ।