यूएईका राजदूत अल नक्बी संग प्रम प्रचण्डको भेटघाट

प्रधानमन्त्री पुष्पकमल दाहाल ‘प्रचण्ड’ र यूएईका राजदूत सइद अल नक्वीबीच शिष्टाचार भेट गर्नुभएको छ ।
मंगलबार बिहान बालुवाटारमा भएको भेटमा प्रधानमन्त्रीले यूएई र नेपालबीच सुमधुर सम्बन्ध रही आएको बताउँदै यसक्रममा यूएइवाट बिभिन्न क्षेत्रमा प्राप्त सहयोगप्रति धन्यवाद व्यक्त गर्नु भयो । प्रधानमन्त्रीले हालै आफ्नो युएई भ्रमणका क्रममा प्राप्त सदभावप्रति आभार व्यक्त गर्नु भयो । उहाँले उक्त भ्रमणका क्रममा अगाडि बढाइएका दुई देशबीचका विभिन्न कार्यलाई गति दिन यूएईबाट पनि उच्च स्तरको भ्रमणको अपेक्षा गरिएको जानकारी गराउनु भयो ।
यूएईका राजदूतले नेपाल सरकार र नेपाली जनतावाट पाएको सहयोग र सदभावप्रति आभार व्यक्त गर्दै नेपालको विकास र भौतिक पूर्वाधारको क्षेत्रमा युएईवाट लगानीको प्रतिवद्धता व्यक्त गर्नुभयो ।

प्रधानमन्त्री र यूएस प्यासिफिक कमाण्डरबीच भेट

प्रधानमन्त्री पुष्पकमल दाहाल ‘प्रचण्ड’ र यूएस प्यासिफिक कमाण्डका कमाण्डर एडमिरल ह्यारी बि ह्यारिजबीच भेट गर्नुभएको छ ।
मंगलबार बिहान बालुवाटारमा भएको शिष्टाचार भेटमा प्रधानमन्त्रीले नेपालको सुरक्षासहित अन्य क्षेत्रमा अमेरिकाले पु¥याएको सहयोगप्रति हार्दिक आभार व्यक्त गर्नुभएको छ । प्रधानमन्त्रीले गत भुकम्पका बेला प्राप्त अमेरिकी सेनाको सहयोग उच्च साझेदारीको नमूना भएको भन्दै त्यसक्रममा नेपालका गाउँहरुमा उद्धार कार्यमा खटिँदा आफ्नो ज्यान गुमाउने ६ जना मरिन सेनाप्रति श्रद्धान्जली प्रकट गर्दै शोकाकूल अमेरिकी सेनामा समवेदना प्रकट गर्नु भयो ।
प्रधानमन्त्रीले नेपाल र अमेरिकाबीच ७० बर्षदेखि नजिकको सम्बन्ध रहेको बताउँदै नेपालको विकास, सुरक्षा र सामाजिक सुधारका क्षेत्रमा अमेरिकाले पुरयाएको सहयोगप्रति धन्यवाद व्यक्त गर्नु भयो । उहाँले आगामी दिनमा पनि अमेरिकासँग विगतको झैं सहकार्यको अपेक्षा गर्नु भयो ।
भेटमा यूएस प्यासिफिक कमाण्डका कमाण्डर एडमिरल ह्यारी बि ह्यारिजले नेपालसँग अमेरिकाको नजिकको सम्वन्ध रहेको बताउँदै अमेरिकी सेनाको समेत आत्मीय सम्वन्ध रहेको बताउनु भयो । उहाँले नेपाली सेनासँगको सहकार्य वारे जानकारी दिँदै नेपालको स्टाफ कलेजमा अमेरिकन सेनाले पढ्ने गरेको तथा नेपालवाट माउण्टेन वार फेर सिक्न पाएकोमा धन्यवाद दिनु भयो ।

चुनाव प्रति कुनै आशंका नगर्नुसः प्रधानमन्त्री

प्रधानमन्त्री पुष्पकमल दाहाल ‘प्रचण्ड’ले अब चुनाव हुन्न कि भनेर कुनै पनि आशंका नपाल्न आग्रह गर्दै अवसरवादीहरुले मात्रै चुनाव हुन्न कि भनेर आशंका पाल्ने वताउनु भयो ।
मंगलबार शिंहदरवारमा माओवादी केन्द्र संसदीय दलको बैठकलाई सम्बोधन गर्दै प्रधानमन्त्रीले उक्त कुरा बताउनु भएको हो । उहाँले भन्नुभयो ‘चुनाव घोषणा भइसकेको छ, सिंगो देश यसमा जुटिसकेको छ । चुनाव सफल पार्न सबैलाई आ आफ्नो ठाउँवाट जुट्न आग्रह गर्दछु ।
प्रधानमन्त्रीले मधेश र जनजातिका मुद्धा सम्बोधन गर्न सरकार गम्भीररुपमा लागिरहेको भन्दै सिमाकंनलाई केन्द्र र प्रदेशको चुनाव अघि टुंगो लगाउने गरी अहिले अन्य बिषयमा संविधान संशोधन गरेर जान पहल भइरहेको वताउनु भयो । उहाँले आफ्नो आसन्न चीन भ्रमणले दुई देशबीचको सम्वन्धलाई अझै सुमधुर बनाउने बताउनु भयो । प्रधानमन्त्रीले भ्रमणका क्रममा नयाँ समझदारी विकास गर्न उच्च स्तरमा महत्वपूर्ण छलफलहरु हुने जानकारी दिनु भयो ।

बिश्व शान्तिका लागि बुद्ध दर्शन महत्वपूर्णः प्रधानमन्त्री

प्रधानमन्त्री पुष्पकमल दाहाल ‘प्रचण्ड’ले बिश्व शान्तिका लागि बुद्ध दर्शनको धेरै ठूलो महत्व रहेको वताउँदै नेपाल र संसारभर शान्ति कायम गर्न बुद्ध धर्म र दर्शनको भुमिका महत्वपूर्ण रहने प्रष्ट पार्नु भएको छ ।
मंगलबार बिहान प्रधानमन्त्री निवास बालुवाटारमा देशका विभिन्न गुम्बावाट आएका बौद्ध लामा गुरुहरुसँगको सामूहिक भेटमा प्रधानमन्त्रीले उक्त कुरा बताउनु भएको हो । उक्त अवसरमा प्रधानमन्त्रीले नेपाल धर्म निरपेक्ष राज्य भएको स्पष्ट पार्दै यहाँ सबै धर्म, सँस्कृति र आस्थाप्रति राज्यको सम्मान रहने वताउनु भयो । उहाँले नेपालमा जन्मिएका गौतम बुद्धले विकास गरेको बुद्ध दर्शन अहिले बिश्वभर फैलिएको बताउँदै शान्ति, सदभाव र भाइचारा सम्बन्ध प्रवद्र्धन गर्न यसको धेरै ठूलो योगदान रहेको वताउनु भयो ।
प्रधानमन्त्रीले धार्मिक पर्यटनका माध्यमवाट देशको सम्वृद्धिमा योगदान दिन सकिने विश्वास व्यक्त गर्दै बुद्ध दर्शनको विस्तार र विकासका पक्षमा आफूले सक्दो योगदान पुरयाउने बताउनु भयो ।
उक्त भेटमा बौद्ध दर्शन प्रबन्ध तथा गुम्बा विकास समितिका पदाधिकारी, देशका विभिन्न गुम्बाका २७ जना बौद्ध लामा गुरुहरुसमेतको सहभागिता थियो । सो क्रममा गुम्बा विकास समितिले देशका गुम्बाहरुको पुर्ननिर्माण र मर्मतका लागि प्रधानमन्त्रीसँग बजेटको माग गरेको थियो । प्रधानमन्त्रीले सरकारका तर्फवाट आवश्यक बजेटको व्यवस्था गरिने जानकारी दिनु भएको थियो ।

मध्यपश्चिमाञ्चल विश्वविद्यालय, सुर्खेतको छैठौं साधारणसभामा सम्बोधन

यस सभाका उपाध्यक्षज्यू
माननीय शिक्षामन्त्री,
मध्यपश्चिमाञ्चल विश्वविद्यालयका सहकुलपति, विश्वविद्यालयका उपकुलपति लगायत सम्पूर्ण सभासद एवम आमन्त्रित महानुभावहरू

१. सबैभन्दा पहिला तत्कालीन मध्यपश्चिमाञ्चल विकास क्षेत्रका जनताको लामो समयसम्मको अथक प्रयास र जनदबाबको परिणाम स्वरूप र राज्यको बहु र विकेन्द्रीकृत विश्वविद्यालयको अवधारणा अनुरूप उच्च शिक्षामा क्षेत्रीय सन्तुलन र विकास र समृद्धिको आधारको रूपमा राज्यको लगानीमा स्थापना गरिएको यो मध्यपश्चिमाञ्चल विश्वविद्यालय सुर्खेतको कुलपतिको हैसियतमा छैठौं सभाको अध्यक्षता गर्ने अवसर प्राप्त गरेकोमा सम्बधित सबैलाई हार्दिक धन्यवाद ज्ञापन गर्दछु ।

२. आजको प्रतिष्पर्धात्मक र सूचना प्रविधिको युगमा शिक्षा युग स्तरीय र गुणस्तरीय हुन सकेन भने त्यस मुलुकका नागरिकहरू पछाडी पर्ने निश्चित छ।जुन मुलुकले आफ्नो मुलुकमा रहेका स्रोत साधनको प्रयोग र परिचालन गर्न सक्ने जनशक्ति उत्पादन गर्न सक्दैन र आजको भूमण्डलीकरणको युगमा युग अनुकुलको नागरिक निर्माण गर्न सक्दैन त्यो मुलुक पनि विकासको दौडमा पछाडि पर्ने निश्चित छ।हरेक मुलुकको शिक्षा प्रणाली र शिक्षामा भएको लगानीबाट प्राप्त हुने उपलब्धिले त्यस मुलुकको भाग्य र भविष्यको निर्धारण गर्दछ।त्यसकारण विकासलाई शिक्षासंग नजोड्ने र शिक्षालाई विकाससँग नजोड्ने हो भने शिक्षा प्रणाली केवल शिक्षित बेरोजगार उत्पादन गर्ने कारखाना मात्र बन्न जाने छ।हामीले शिक्षा प्रणालीलाई संरचनागत रुपमा बदल्न अनिबार्य छ।हाम्रो शिक्षा प्रणाली हाम्रो मौलिकतामा आधारित भएर हाम्रो साधन स्रोत परिचालन र उपयोग गरी विकासका लागि साधक बन्नु आवश्यक छ।

३. विकास र समृद्धि उपलब्ध प्राकृतिक स्रोत साधन र त्यसलाई प्रसोधन र परिचालन गर्न सक्ने दक्षता भएका मानव संसाधनमा निर्भर गर्दछ।आज हरेक मुलुक जो विकास र समृद्धिको शिखरमा पुगेका छन् तिनीहरुको एक प्रमुख आधार उपलब्ध स्रोत साधनलाई परिचालन गर्नसक्ने सीप र दक्षता भएका मानव जनशक्तिको विकास नै हो।यस क्षेत्रको विकास र समृद्धिको लागि मध्यपश्चिमाञ्चल विश्वविद्यालयले उपलब्ध स्रोत साधनलाई उपयोग र परिचालन गर्न सक्ने सीपमा आधारित प्राविधिक र दक्ष मानव संसाधनको विकास गर्ने छ भन्ने विश्वास समेत लिएको छु ।

४. जलस्रोतको भरपुर सम्भावनालाई मध्यनजर गरी साना ठुला विद्युत परियोजनामा स्वदेशी पुँजी, निजी क्षेत्र, सरकारी क्षेत्र, सहकारी क्षेत्रलाई परिचालन गर्ने हो भने हामी हाम्रा सम्भावनालाई सार्थकतामा रुपान्तरण गर्न सक्छौ।मध्यपश्चिमाञ्चल विश्वविद्यालय अन्तर्गत जडीबुटीसम्बन्धी अध्ययन अध्यापन र अनुसन्धानको प्रक्रिया थालनी गर्नु आवश्यक छ।त्यसैगरी यस क्षेत्रका जलभण्डारका रुपमा रहेका कर्णाली, भेरी र राप्ती नदी र तिनका सहायक साना ठूला नदीहरुबाट जलविद्युत र कृषिको लागि आवश्यक सिचाई र खानेपानीको समेत आपूर्ति हुने प्रचुर सम्भाबना हाम्रो वीचमा खेर गइरहेको छ।यसलाई पनि अध्ययन, अध्यापन र अनुसन्धानको विषयवस्तु बनाएर विश्वविद्यालयको कार्यक्रममा समेट्न सकियो भने निजि र सरकारीस्तरबाट साझेदारीका रुपमा राष्ट्रिय अन्तराष्ट्रियस्तरको समेत लगानी भित्र्याउने र हाइड्रो सेन्टरको रुपमा विकास गर्न सकिन्छ।

५. सदियौं देखि उत्खननको प्रतिक्षामा रहेको पेट्रोलियम पदार्थको अपार सम्भावना युक्त समृद्धिको आधारको सुरुवात गर्न सकिएको छैन।अब विश्वविद्यालय शिक्षामा यस्ता सम्भावनाको खोज अनुसन्धान गर्न सक्ने र त्यसको परिणाम देखिने गरी लगानी र व्यवस्थापन गर्न ढिला गर्नुहुदैन।प्रान्तीय एवं केन्द्रीय सरकार दुवैले यिनी सम्भावनाहरूलाई प्राथमिकतामा राखेर पेट्रोलियम पदार्थको उत्खनन गर्ने कार्यको थालनी गर्न सके लगायत मुलुकको समृद्धि र पेट्रोलियम पदार्थमा रहेको परनिर्भरताको अन्त्य हुने थियो।

६. विश्वको मानचित्रमा नेपाल र नेपालको मानचित्रमा मध्यपश्चिमाञ्चल विकास क्षेत्र अनेकन प्राकृतिक र मौलिक, सास्कृतिक स्रोत साधनले भरिपूर्ण र मजबुत हुँदा(हुदै पनि पिछडिएको र अल्पविकसित क्षेत्रको रुपमा रहेको छ।यो क्षेत्रको विकास र पहिचानका लागि यस क्षेत्रमा रहेका विकासका प्रचुर प्राकृतिक स्रोतसाधनको अत्याधिक दोहन र परिचालन गर्न सक्ने र मौलिक कला, संस्कृति, भाषा, साहित्य, धार्मिक तथा ऐतिहासिक एवं पुरातात्विक महत्त्वका क्षेत्रको विकास र विस्तार गर्ने हो भने सो गर्न सक्ने बनाउने प्रकृतिको शिक्षाको प्रबन्ध हुनुपर्दछ।दैलेखको पंचकोशी, जुम्लाको चन्दननाथ र तातोपानी, मुगुको रारा, हुम्ला हुँदै मानसरोबर यात्रा, डोल्पाको शे(फोक्सन्ड़ो, सुर्खेतको काँक्रेविहार लगायतका पर्यटकीय क्षेत्रको विकासका लागि आवश्यक पर्ने जनशक्ति उत्पादन गर्ने र परिचालन गर्ने, अध्ययन, अध्यापन र अनुसन्धानको केन्द्रको रुपमा मध्यपश्चिमाञ्चल विश्वविद्यालयको विकास गर्न सकिन्छ।

७. कर्णालीका अव्यवस्थित स्याउ र ओखर बगैंचाहरुलाई व्यवस्थित र व्यवसाय मुखीरुपमा संचालन गरेर उचित बजारको व्यवस्था गर्न सकियो भने र बाँके र बर्दियाको उर्वर खेती योग्य जमिनलाई खाध्य तथा अन्न भण्डारको रुपमा विकास गर्ने र दैलेख, सुर्खेत लगाएतका ठाउँमा सुन्तला, अर्ग्यानिक तरकारी तथा फलफुल उत्पादन र बजारीकरण गर्ने प्रकृतिको योजनाका साथ जुट्न र आवश्यक जनशक्ति उत्पादन गर्न मध्यपश्चिमाञ्चल विश्वविद्यालयको कार्यक्रममा कृषि सम्बन्धी कार्यक्रमहरू थप गरी अगाडि बढ्नुपर्ने हुन्छ।

८. रोग ग्रस्त र महामारी प्रभावित क्षेत्रको रुपमा पहिचान बनाएको मध्यपश्चिमाञ्चल विकास क्षेत्रको सिंगै कर्णाली अनेकन मेडिकल जडिबुटीहरुको भर्जिन ल्याण्ड र खानी नै हो।यस सम्बन्धि अध्ययन, अध्यापन र अनुसन्धान गरी जडिबुटी प्रसोधन केन्द्रको रुपमा विकास गर्न आवश्यक छ जसका लागि मध्यपश्चिमाञ्चल विश्वविद्यालयले आफ्नो मुख्य रणनीतिमा राखेर कार्य रूप दिनुपर्ने आवश्यक छ र सो अनुरुप प्रस्ताव अगाडी समेत बढिरहेको छ।यसका लागि मध्यपश्चिमाञ्चल विश्वविद्यालयले आफ्नो कार्यक्रममा चिकित्साशास्त्र संकाय थप गरी त्यस अन्तर्गत नर्सिङ, आयुर्वेद, हर्बल आदिको पठनपाठन गर्न मध्यपश्चिमाञ्चल विश्वविद्यालय अन्तर्गत कार्यक्रमहरू थप गरी अगाडी बढाउन नेपाल सरकार प्रतिबद्ध छ।

९. अन्त्यमा, आजको भूमण्डलीकरणको युगमा सूचना प्रविधिले निम्त्याएको ग्लोबल कम्युनिटीमा समायोजन भई आजको विश्वबजारमा खपत हुन सक्ने सीपमा आधारित, उपलब्ध प्राकृतिक स्रोत साधनलाई परिचालन गर्न सक्ने योग्यता र दक्षता भएका युगस्तरीय, गुणस्तरीय, प्रतिष्पर्धी, विकास र समृद्धिका साधक जनशक्ति उत्पादनमा मध्यपश्चिमाञ्चल विश्वविद्यालयको महत्वपूर्ण योगदान रहनेछ भन्ने पूर्णविश्वास राख्दै यस विश्वविद्यालय र यस क्षेत्रको गरिबी, रोग, भोक, अशिक्षा, पछौटेपन, अन्धविश्वासलाई चिर्दै स्वाभिमानी, स्वाबलम्बी र राष्ट्रवादी नागरिक निर्माणको अभियानमा यस विश्वविद्यालयको उच्चतम भूमिका रहनेछ र यो मध्यपश्चिमाञ्चल विकास क्षेत्र र सिङ्गो मुलुकलाई नै विकास र समृद्धिको द्रूत गतिमा डोरयाउन सहयोग गर्ने छ भन्ने आशा र अपेक्षा सहित मेरो मन्तव्य यहिँ अन्त्य गर्दछु ।
धन्यवाद
२०७३ साल चैत्र

श्रीलंकाका सेना प्रमुख क्रिसान्थे डि सिल्भासंग प्रम प्रचण्डको भेट

प्रधानमन्त्री पुष्पकमल दाहाल प्रचण्ड सँग श्रीलंकाका सेना प्रमुख क्रिसान्थे डि सिल्भाले शिष्टाचार भेट गर्नुभएको छ ।
बुधबार दिउसो बालुवाटारमा भएको भेटमा प्रधानमन्त्रीले नेपाल र श्री लंका बीच विगत ६० बर्ष देखि सुमधुर सम्बन्ध रहँदै आएको र यसखालका उच्चस्तरका भ्रमणले आपसी सम्बन्धलाई अझ उचाईंमा पुरयाउने बिश्वास व्यक्त गर्नु भयो । प्रधानमन्त्रीले श्री लंकाबाट नेपालले पाएको न्यानो सदभाव प्रति आभार व्यक्त गर्नु भयो ।
प्रधानमन्त्रीले नेपालको शान्ति प्रक्रिया र सेना समायोजन प्रक्रिया विश्वकै मौलिक र नमूना योग्य भएको भन्दै नेपालले विभिन्न चरणमा श्रीलंकाको अनुभव वाट सिक्ने मौका पाएको अनुभव सुनाउनु भयो । भेटका अवसरमा श्रीलंकाका सेनापतिले नेपाल बुद्धको जन्मभुमि भएकाले श्रीलंकाका धेरै जनता यहा आउन अति उत्सुक रहेको बताउँदै आफूले पहिलो पटक सुन्दर देश नेपालको भ्रमण गर्ने अवसर पाएकोमा आभार प्रकट गर्नु भयो ।

मधेश, आदिवासी जनजाति, थारु लगायतका मुद्धा सम्बोधन हुने गरी संबिधान संशोधन हुन्छ

प्रधानमन्त्री पुष्पकमल दाहाल ‘प्रचण्ड’ले प्रत्यक्ष निर्वाचित कार्यकारी राष्ट्रपतिको मुद्धा अगाडि बढाउने बताउनुभएको छ ।
हिजो सोमबार दिउसो प्रधानमन्त्री निवास बालुवाटारमा नयाँ शक्ति पार्टी, नेपालको १० लाख जनताको हस्ताक्षर सहितको ज्ञापनपत्र बुझ्दै प्रधानमन्त्रीले उक्त कुरा बताउनु भएको हो । प्रधानमन्त्रीले विगत लामो समय देखि आफूले प्रत्यक्ष निर्वाचित कार्यकारी राष्ट्रपति र पूर्ण समावेशिताको पक्षमा अडान राख्दै आए पनि संविधानसभामा दुई तिहाई पुग्न नसकेका कारण फरक मत दर्ज गरेर यसलाई जनताका बीचमा राखेको प्रष्ट पार्दै आगामी दिनमा पनि यो मुद्धालाई अगाडि बढाउने बताउनु भयो । प्रधानमन्त्रीले प्रत्यक्ष निर्वाचित कार्यकारी राष्ट्रपतिका पक्षमा रहेका सबैलाई सहकार्य गरेर अघि बढ्न आग्रह गर्दै आगामी निर्वाचनमा यो मुद्धालाई जनता बीच लानु पर्ने कुरामा जोड दिनु भयो ।
प्रधानमन्त्रीले अहिले सरकार मधेश, आदिवासी जनजाति, थारु लगायतका मुद्धा सम्बोधन हुने गरी संबिधान संशोधन गरेर चुनाव सम्पन्न गराउन लागिपरेको बताउँदै सबैलाई चुनावमा सहभागी हुन आग्रह गर्नुभयो ।

हवाइ फायर पछी एमालेको कार्यक्रम स्थगित

नेपालगन्जको बुनाना चोकमा प्रहरी र मधेशी मोर्चाका कार्यकर्ता बीच झडप भइरहेको छ । प्रहरीले भीड नियन्त्रण गर्न दुई राउन्ड हवाई फायर गरेको बाँके प्रहरी प्रमुख एसपी बद्री बस्यालले जानकारी दिए । प्रहरी र मोर्चा कार्यकर्ताबीच झडप जारी छ । एसपी बस्यालले मोर्चाका कार्यकर्ताहरू हातमा लाठी लिएर प्रदर्शनमा आएको बताए ।
नेकपा एमालेको मेची महाकाली अभियान अन्गर्तत आज नेपालगन्जमा सभा भइरहेको छ । सभामा एमाले उपाध्यक्ष बामदेव गौतमले तराई पहाड अलग गर्नु देशलाई समाप्त पार्ने खेल भइरहेको बताए । जनतालाई एकताबद्ध बनाउने पार्टी एमाले मात्रै भएको दाबी गर्दै उनले एमाले नभएको भए, बहुदल स्थापना, ०६२/६३को आन्दोलन, राजतन्त्रको अन्त्य, संघीय लोकतान्त्रिक गणतन्त्र स्थापना नहेने दाबी गरे । एमालेको अभियान विरुद्ध मधेशी मोर्चाले प्रदर्शन गरेको हो ।  प्रदर्शनका पछी एमालेको सभा स्थगित गरिएको छ। हवाइ फायर भएको स्थान एमालेको सभा भएको ठाउँबाट १५ किमि टाढा बर्दिया जाने बाटोमा हो ।

७४४ स्थानीय तहको कार्यालय सञ्चालन तथा कार्यप्रारम्भ

प्रधानमन्त्री पुष्पकमल दाहाल ‘प्रचण्ड’ ले देशका ७४४ वटै स्थानीय तहको कार्यालय सञ्चालन तथा कार्य प्रारम्भको समुद्घाटन गर्नुभएको छ । मंगलबार बिहान ललितपुर महानगरपालिकामा आयोजित बिशेष समारोहमार्फत् प्रधानमन्त्रीले देशका सबै स्थानीय तहका कार्यालय सञ्चालन तथा कार्यप्रारम्भको समुद्घाटन गर्नुभएको हो ।
उक्त अवसरमा प्रधानमन्त्रीले नेपालमा स्थानीय शासनको इतिहासमा नयाँ अध्याय सुरु भएको बताउँदै यो सामान्य सुधार नभएर महत्वपूर्ण क्रान्तिकारी परिवर्तनको प्रतिक भएको बताउनु भयो । उहाँले सिंहदरवारमा निहित कार्यपालिका, व्यवस्थापिका र न्यायपालिको अधिकार र स्रोत साधनलाई पहिलो चोटी गाँउ गाँउसम्म पुरयाउने गरी स्थानीय तहलाई अधिकार सम्पन्न तुल्याइएको पनि बताउनु भयो । प्रधानमन्त्रीले भन्नुभयो ‘हालसम्म जिल्ला, अञ्चल, क्षेत्रीय सदरमुकाम र खासगरी काठमाडौंबाट हुदै आएका थुपै्र काम, कार्वाही र सेवाको वितरण सम्बन्धित गाँउपालिका वा नगरपालिकाबाटै हुनेछ ।’
प्रधानमन्त्रीले स्थानीय तहको पुर्नसंरचना र कार्यप्रारम्भसँगै गणतन्त्रको उज्यालो घामको अनुभूति जनताले गर्न पाएको भन्दै यो परिवर्तन ल्याउन योगदान पुरयाउने सबैमा हार्दिक आभार प्रकट गर्नु भयो । उहाँले कर्मचारीहरुलाई स्थानीय तहमा जिम्मेबारी लिएर जनताको सेवामा समर्पित हुन निर्देशन दिनु भयो ।
संबिधान कार्यान्वयनका लागि यो एउटा ऐतिहासिक फड्को हो भन्दै प्रधानमन्त्रीले भन्नुभयो ‘सरकार र विकास अब मतपेटिकाका रुपमा जनताको घरदैलोमा छ । अहिले सरकारको अर्जुन दृष्टि स्थानीय तहको निर्वाचनमा केन्द्रित छ । निर्वाचन सफल हुँदा देशले जित्छ, जनताले जित्छन्, । स्थानीय तहको निर्वाचन लोकतन्त्रको सबैभन्दा ठूलो उत्सव हो । २० बर्षपछि गुणात्मक उपलब्धीसहित हुन लागेको यो महोत्सवमा विना संशय, विना धक, विना डर, मन वचन र कर्मले उत्साहका साथ सहभागी हुन म सिंगो देशलाई हार्दिक आमन्त्रण गर्दछु ।’
प्रधानमन्त्रीले सरकारको अहिले ध्यान र जोड राजनीतिक समझदारीका आधारमा संबिधान संशोधन गर्न रहेको भन्दै मधेश, पहाड, हिमाल जोड्ने र संविधानको स्विकार्यता बढाउने अडानवाट आफू एक इन्च पनि पछि नहटेको स्पष्ट गर्नु भयो ।

साभार ; क. प्रचण्ड

प्रम प्रचण्डले भने मधेसीहरुको माग चाडै पुरा हुन्छ

प्रधानमन्त्री पुष्पकमल दाहालले स्थानीय निर्वाचनका लागि सिमांकन परिमार्जन आवश्यक नभएको बताएका छन् । उनले सरकारको प्रथामिकतामा सबैलाई समेटेर संविधान कार्यान्वयन र तीन तहको निर्वाचन भएको स्पष्ट पारेका छन ।
ललितपुर महानगरपालिकाको कार्यालयबाट देशै भरका स्थानीय तहको मंगलबार उद्घाटन गर्दै प्रधानमन्त्री दाहालले आन्दोलनरत दलहरुको माग सम्बोधन गर्न सरकार गम्भीर रहेको बताउँदै राजनीतिक सहमति जुटे पछि संविधान संशोधन पास गर्ने प्रतिवद्धता व्यक्त गरे ।
“मधेसी जनताको माग सम्बोधन गर्न म एक इन्च पनि पछि हटेको छैन,” उनले भने, “सबै दलहरु बीच समझदारी तपाइहरुको माग सम्बोधन गर्नेछौ । स्थानीय निर्वाचन सम्पन्न गर्नका लागि संविधान संशोधन जरुरी छैन । तराईका जनता पनि यो ऐतिहासिक निर्वाचनमा सहभागी भई आफ्नो अधिकार सुनिश्चित गर्न चाहन्छन ।”
उनले नेपाल सबैको भएकाले सबैले स्थानीय निर्वाचन सम्पन्न गर्दै जनतालाई अधिकार दिलाउन सहयोग गर्नुपर्ने बताए ।
सरकारले स्थानीय निर्वाचनको घोषणा गरेर आवश्यक तयारी अगाडि बढाइसकेकाले त्यसमा सबैलाई सहभागी हुन आग्रह गरे ।  “निर्वाचन तोकिएको समयमै हुनुपर्छ, यसका लागि निर्वाचन आयोग पनि तदारुकता साथ अगाडि बढेको छ,” उनले भने, “स्थानीय तहको निर्वाचन आम जनताको उत्सब हो । निर्वाचन हुनुपर्छ कुन पार्टीले जित्छ वा हार्छ भन्ने  महत्वपूर्ण होइन । मेरो अर्जुन दृष्टि भनेको निर्वाचन सम्पन्न गराउनु हो । यसमा जनताले जित्छन् ।”
आन्दोलनमा रहेका मधेसी मोर्चा र अन्य पार्टीहरुलाई पनि यो ऐतिहासीक उत्सबमा सहभागी हुन दाहालले आग्रह गरेका छन् । “२० वर्षपछि आमुल परिवर्नतसहित जनताकोे घरमा अधिकार जान लागेको छ । यसमा सबैको सहभागिता आवश्यक छ,” उनले भने ।
उनले मधेसी जनताको अधिकारलाई सम्बोधन गर्न जरुरी रहेको बताउँदै, त्यसका लागि सबै गम्भीर हुनुपर्ने बताए । “मैले मधेसी, थारु, जनजाती, दलीतको अधिकारका लागि जनयुद्धदेखि लड्दै आएको हो । जनयुद्धमा करिब १३ मधेसी जनताको ज्यान गएको छ । उहाँहरु प्रति म ऋणी छु ।”
त्यसैगरी उनले संविधानअनुसार गठित ७४४ स्थानीय तहको कार्यन्वयले जनताको अधिकार गाउँ–गाउँमा पुगेको उद्घोष गरे । “स्थानीय तह कार्यान्वयनमा आउनु गणतन्त्र कार्यान्वयनको एउटा महत्वपूर्ण खुड्किलो हो । यसलाई मैले जनता विजयी भएको दिनको रुपमा लिएको छु,” उनले भने ।
उनले विभिन्न बैचारिक मतभेदका बाबजुद हालै स्थानीय विकास मन्त्री भएर आएका कमल थापालाई सरकारलाई समर्थन गरेकोमा धन्यवाद दिए । “वैचारिक मतभेदका बाबजुत संविधान कार्यान्वयनमा सहयोग गर्नुपर्छ भन्ने लागेर कमल थापाजीहरु सरकारमा आउनुभएको छ,” उनले भने, “सरकारले घोषणा गरेको स्थानीय निर्वाचन सम्पन्न गर्न आएको भन्नुभएको छ । यो खुसीको कुरा हो ।”
त्यसैगरी कार्यक्रममा बोल्दै स्थानीय विकास मन्त्री थापाले प्रजातन्त्र कार्यान्वयनका लागि स्थानीय निर्वाचनको विकल्प नभएको बताए । उनले निर्वाचन सम्पन्न गर्नकै लागि आफू सरकारमा आएको बताए ।
यसैबीच ललितपुर महानगरपालिकाको उद्घाटन गर्नै प्रधानमन्त्रीले देशभरका ७४४ स्थानीय तह मंगलबारदेखि औपचारिक रुपमा कार्यान्वयनमा आएको घोषणा गरे । 

एमालेको कार्यक्रममा जादै गरेको बसमा आगजनी

नेकपा एमालेको जारी मेची–महाकाली अभियान अन्तरगत मंगलबार नेपालगन्जमा आमसभा हुनु भन्दा अघि नै मधेसी मोर्चाका कार्यकर्ताले बिरोध स्वरुप यात्रुवाहक बसमा आगजनी गरेका छन ।

नेपालगन्जमा एमालेले गर्ने भनेको आमसभा बिथोल्ने उद्धेश्यले मोर्चाका कार्यकर्ताले भे १ ख २०४२ नम्बरको बसमा आगजनी गरेका हुन । बसमा अधिकांश यात्रुहरु एमाले आमसभामा जाँदै गरेका सुभेच्छुक तथा कार्यकर्ताहरु भएको बुझिएको छ । बस आगजनी भए पनि यात्रु भने सकुशल छन ।

सोही आमसभालाई लक्षित गरी मधेसी मोर्चाले मंगलबार बांके जिल्ला बन्दको आह्वान गरेका थिए । बन्दको क्रममा बस चलाएको भन्दै उनीहरुले आगजनी गरेका थिए ।

आगजनी पछि घटनास्थलमा अवस्था साम्य पार्न प्रहरी खटिएको छ । साथै बाँकेमा एमाले समर्थित मुस्लिम, थारु लगायत विभिन्न जातजाति संगठनहरुले मोर्चा उक्त घटनाको बिरोधमा रयाली निकालेका छन ।